Busturialdeko Hitza

Mundaka laugarren izan da Espainiako trainerillen txapelketan

Mundaka Olatu txar bat harrapatu eta laugarren postuagaz konformatu behar izan direla esan du taldeko presidenteak.

o. zabalondo

Mundakako Arraun taldeko jubenilak laugarren postuan geratu dira Espainiako trainerillen txapelketan, 15.33.48ko denboragaz. Zapatuan Castron jokatu zen Espainiako txapelketa, eta Bizkaiko eta Euskadiko txapelketak irabazi ostean, mundakarrak ezin izan zuten denboraldiko azken txapelketa irabazi.

Jabi Olazar Mundakako Arraun taldeko presidentearen esanetan, Mundakako jubenilak «zorte txarra» izan zuten azken luzean. «Olatu txar batek laugarren postura eraman gaitu», adierazi du Olazarrek.

Mecosek irabazi du Espainiako Trainerillen txapelketa, 15.13.28ko denboragaz. Haren atzetik sailkatu ziren Castro eta Astillero. «Mecos oso ondo ibili da eta bera zen aurtengo faboritoa, baina gutxienez bigarren postua espero genuen». Hala ere, jubenilek aurten egindako lana azpimarratzekoa dela esan du Olazarrek.

Datorren denboraldia

Trainerillen denboraldia amaitu dute eta datorrenari begira jarri behar dira, «momentuz ez dakigu datorren urtean zer gertatuko den, oraindik batzartu egin behar gara gauzak zehazteko».